catt

跑馬拉松亂飲食礙體力
能量食品飲品搶水份　人體反應變慢
2010年02月02日

【本報訊】距離一年一度的大型馬拉松賽事尚有不足一個月，備戰方法大家應該心裏有數，但原來如何食用能量食品，何時飲用運動飲品，甚至如何綁鞋帶和保暖，也會影響表現；專家又提醒巿民，若事前訓練不足，應認真考慮放棄比賽，「唔係話為咗二、三百蚊（報名費）就夾硬要去，盞累咗醫療輔助隊。」
記者：張嘉雯

浸會大學體育系副教授雷雄德表示，不少人擔心馬拉松賽事期間肚餓，會帶備香蕉或能量食品，例如 power bar，但其實沒有必要，「如果有足夠訓練，跑緊唔需要食嘢， power bar係濃縮食品，會攞走好多水份，啲水份去晒消化系統，好似腸臟同個胃，肌肉系統少咗水，反應會慢咗。」他建議跑手若必須食用能量食品，應在水站前食完，再補充水份。


鞋帶綁兩個結免甩脫

至於運動飲品，雷雄德指運動飲品含 6%糖份，賽前應試飲，「平時要飲吓，唔係到時腸胃會唔適應。」平日慣飲咖啡者，比賽當天可照樣飲用。他說，眾多飲品中，紅牛危險性最高，咖啡因含量相等於兩至三杯咖啡，「咖啡因係利尿劑，會令水份流失，做耐力性運動嘅時候可以加速脂肪代謝，但同時會令人容易虛脫。」
其中一個小問題，過往經常出事，「年年有人跑跑吓甩鞋，我都唔明，其實綁兩個結咪得囉，又見過有人着行山鞋跑，行山鞋鞋底太硬，會足弓發炎。」
完成賽事後，免疫力會下跌，最重要是保暖，「有啲人冇受傷都會即刻走去做物理治療，覺得畀咗錢唔好執輸，但呢種係被動式嘅放鬆法，只係呃咗神經系統，以為已經舒服咗。」他表示，肌肉需要 6至 8小時恢復，完成賽事後應多飲水，食用碳水化合物，然後「大覺瞓」，讓身體充份休息。
他又說，全程馬拉松要在 9個月前開始訓練，半馬拉松需在 6個月前訓練，未開始訓練的選手，要懂得放棄比賽，「生理、心理都唔配合，好多時係報咗名，諗住唔好嘥咗幾百蚊，有乜嘢事就累人累物。」
他解釋，即使 10公里賽也要在 3個月前開始訓練，「練氣你係真係要去跑，唔可以走咗去踩單車，每個星期兩至三次，每次 30至 45分鐘，另外亦要做肌肉訓練，因為肌肉要夠力先可以支撐到個身體。」

by apple daily